Mae gwaith adeiladu wedi dechrau ar 104 o gartrefi newydd mewn lleoliad gwych ar hyd Glannau SA1 Abertawe.

Bydd Coastal yn cymryd tua 36 mis i gwblhau’r cartrefi, a fydd yn cael eu rhentu i bobl ag angen tai ledled y ddinas. Fel gyda phob cartref Tai Coastal, bydd rhenti yn is na chyfradd y farchnad y byddech yn disgwyl ei thalu i landlord preifat am gartref tebyg yn yr un lleoliad.

Mae adeiladu’r cartrefi yn cael ei ariannu’n rhannol gan Lywodraeth Cymru ac yn cael ei wneud gan y datblygwr, Everwell Development, yn eu prosiect cyntaf yn ne orllewin Cymru.

Bydd y datblygiad hefyd yn cynnwys adeilad masnachol newydd ar y llawr gwaelod ynghyd â 93 o leoedd parcio ceir a pharcio beiciau diogel.

“Mae'r cartrefi fforddiadwy o ansawdd uchel hyn mewn lleoliad anhygoel” meddai Pennaeth Datblygu Coastal, Kelvin Rees. “Mae glan y dŵr SA1 yn llecyn mor brydferth ac yng nghanol glannau’r ddinas gyda chysylltiadau trafnidiaeth, amwynderau, bywyd nos a siopa i gyd o fewn ychydig funudau ar droed.”

“Fel datblygwyr, rydym yn falch o fod yn bartner gyda Thai Coastal i ddod â 104 o gartrefi fforddiadwy y mae mawr eu hangen i’r ardal adfywio hon ar lan y dŵr” meddai Charlie Parry, Prif Weithredwr Everwell Development. “Gyda’n gilydd, nid adeiladu tai yn unig yr ydym, ond creu cymunedau ffyniannus, cynhwysol lle gall pobl berthyn mewn gwirionedd.”